Taya lumbu moluhepo olunene

26 June 2019 | Local News

Ewi lyaNooli olya tsakanene naThadeus Sinonge (48) opamwe nomukulukadhi gwe Lucia Kampanza mboka yahokolola nkene taya mono iihuna kehe esiku omolwa oluhepo ndoka taya lumbu mulwo.

Mboka yaali ayehe kaye na iilonga.

Pethimbo lyoonkundathana ndhika, Sinonge opo owala a thiki megumbo konima sho eende oshinano shookilometa 12 okuza pomukunda gwopopepi hoka a Ii a ka konga omboga yopamuthigululwakalo hayi ithanwa Mutete.

“Onkalamwenyo oye tu dhigupalela, otatu mono iihuna. Ngaashi mu wete katu na shoka tatu li. Hewa nena konguloshi sho tatu ka lya Mutete, ogo owala tatu li pwaahena oshithima,” Sinonge a popi.

Okwa popi kutya onkalo yoshikukuta oye ya dhenga noonkondo molwaashoka inaya mona mo sha mepya lyawo, omolwa omuloka gwa kundipala ngoka ya dhidhilike nuumvo.

Sinonge okwa popi kutya ngashiingeyi oye na owala omukumo kutya epangelo otali ka tula miilonga oprograma yoondya dhoshikukuta opo ya vule okuhupila moprograma ndjoka.

“Ngashiingeyi otwa tegelela owala oprograma ndjoka nokugalikana kutya momvula twa taalela omuloka otagu kala guli nawa.”

Kaleke kondjala, Sinonge okwa popi kutya oya taalela wo omikundu dhilwe ngaashi ombete nompumbwe yiinguma unene pethimbo ndika sho kwa talala.

Ofamili ndjoka ohayi lala kombete yiiti kayi na etalashe ihe oyi na owala ooshako dhuusila wepungu niikutu yawo.

“Katu na iikumbatha nombete yetu kayi na etalashe na otwa kala monkalo ndjoka uule woomvula ngashiingeyi.”

Sinonge ngoka a li sekuriti nale na okwa longa moRundu uule woomvula heyali okwa popi kutya omolwa omikundu odhindji ondjambi ye inayi vula oku ya hupitha, na okwa tokola okukonga ehala opo ya vule okukala taya limi epya lyawo.

“Onda li tandi mono ondjambi oshona noonkondo moRundu. Ohiila oyi na ondilo onkene onda tokola okutembukila komukunda nokukambadhala noshinima shimwe ishewe.

Omupya omunene iinima inayi enda ngaashi ndali tandi pangele ihe otandi kambadhala okukonga omukalo gwokupalutha ofamili yandje,”Sinonge a yelitha.

Kombinga yomeya, Sinonge okwa popi kutya omboola ndjoka yili popepi nayo oyi li oshinano shookilometa 5.

Okwa popi kutya okwa hala okutula oshikunino pegumbo ihe omolwa oshinano okuya hoka haya kutha omeya otashi shololitha noonkondo.

Okapangelo hoka keli popepi nayo oke li koRundu oshinano shookilometa 30, omanga oskola ndjoka tayi adhika popepi yi li oshinano shookilometa 12 momukunda tagu ithanwa Likwaterera.

Onkalo ndjoka otayi mu thiminike opo a penduke ongula onene kehe esiku opo a thindikile koskola okanona ke kokakadhona koomvula hamano, Teofili.

Sinonge ota kongo ekwatho maasihenda opo ya vule oku mu yambidhidha nofamili ye.